• ਦੋਸਤੋ ਹੁਣ ਸਾਈਕਲ ਵੀ ਚੱਲੀ ਦੂਰ

ਲਉ ਵੀ ਦੋਸਤੋ,ਹੁਣ ਆਦਤ ਪਾ ਲਉ,ਪੈਦਲ ਚੱਲਣ ਦੀ,ਬਦਲਦੇ ਜ਼ਮਾਨੇ ਨਾਲ ਬਦਲਦੇ ਰਹਿਣਾ ਚੰਗਾ ਐ,ਨਹੀਂ ਤਾਂ ਫ਼ਿਰ ਮਜ਼ਬੂਰੀ ਬਸ ਤਾਂ ਬਦਲਣਾ ਪੈਣਾ ਹੀ ਐ,ਜਿਨ੍ਹਾਂ ਨੂੰ ਮਾਣ ਐ,ਆਪਣੀ ਦੋ ਪਹੀਆ ਵਾਹਨ 'ਤੇ,ਉਹਨਾਂ ਲਈ ਇਹ ਗੱਲ ਤਾਂ ਪਸੀਨੇ ਛੁਡਾਉਣ ਵਾਲੀ ਐ,ਤੁਸੀਂ ਵੀ ਕਹੋਗੇ ਕਿ ਪਤਾ ਨਹੀਂ ਕਿਹੜੇ ਵਾਹਨ ਦੀ ਗੱਲ ਕਰਦਾ ਐ,ਯਾਰੋ ਮੈਂ ਤਾਂ ਗੱਲ ਕਰਦਾ ਆਂ,ਗਰੀਬਾਂ ਦੀ ਸਵਾਰੀ ਕਹੀ ਜਾਣ ਵਾਲੀ ਪਰ ਅਮੀਰਾਂ ਦੀ ਜ਼ਿੰਦਗੀ ਨੂੰ ਤੰਦਰੁਸਤ ਰੱਖਣ ਵਾਲੀ ਅਤੇ ਗਰੀਬਾਂ ਨੂੰ ਰਫ਼ਤਾਰ ਬਖਸ਼ਣ ਵਾਲੀ ਸਵਾਰੀ ਸਾਈਕਲ ਦੀ,

ਜਦ ਗੋਰਿਆਂ (ਅੰਗਰੇਜ਼ਾਂ) ਨੇ ਸਾਈਕਲ ਭਾਰਤ 'ਚ ਲਿਆਂਦਾ ਤਾਂ ਪੰਜਾਬੀ ਬਜ਼ੁਰਗਾਂ ਨੇ ਇਸ ਨੂੰ ਸ਼ੈਤਾਨ ਦਾ ਚਰਖਾ ਕਹਿ ਸੰਬੋਧਤ ਕੀਤਾ, ਪਰ ਸਮਾਂ ਬਦਲਿਆ ਤੇ ਸਾਈਕਲ ਇਨਸਾਨੀ ਜ਼ਿੰਦਗੀ ਦਾ ਅਟੁੱਟ ਹਿੱਸਾ ਬਣ ਗਿਆ ਅਤੇ ਸਮੇਂ ਦੀ ਰਫ਼ਤਾਰ ਨਾਲ ਇੱਕ ਸਮਾਂ ਅਜਿਹਾ ਵੀ ਆਇਆ,ਜਦੋਂ ਕਿਸੇ ਦੇ ਦਾਜ 'ਚ ਸਾਈਕਲ ਆਉਂਦਾ ਸੀ ਤਾਂ ਉਸ ਦੀ ਕਈ ਪਿੰਡਾਂ 'ਚ ਚਰਚਾ ਹੁੰਦੀ ਸੀ.ਵਕਤ ਦਾ ਗੇੜ ਸਾਈਕਲ ਦੇ ਪਹੀਆਂ ਵਾਂਗ ਆਪਣੀ ਰਫ਼ਤਾਰ ਨਾਲ ਘੁੰਮਦਾ ਰਿਹਾ ਅਤੇ ਡਾਕਟਰਾਂ ਨੇ ਵੀ ਖੋਜ ਕਰਕੇ ਦੁਨੀਆਂ ਭਰ ਨੂੰ ਦੱਸਿਆ ਕਿ ਜਿਹੜਾ ਵਿਅਕਤੀ ਸਾਈਕਲ ਚਲਾਉਂਦਾ ਹੈ,ਉਹ ਕਈ ਬੀਮਾਰੀਆਂ ਤੋਂ ਮੁਕਤ ਹੋ ਜਾਂਦਾ ਹੈ ਕਿਉਂਕਿ ਸਾਈਕਲ ਚਲਾਉਣ ਨਾਲ ਸਰੀਰ ਦੇ ਜ਼ਿਆਦਾਤਰ ਅੰਗ ਇੱਕੋ ਸਮੇਂ ਕਾਰਜਸ਼ੀਲ ਹੁੰਦੇ ਹਨ.

ਲਉ ਬਾਈ,ਇਹ ਤਾਂ ਸੀ ਸਾਈਕਲ ਦੀਆਂ ਸਿਫ਼ਤਾਂ 'ਤੇ ਇਤਿਹਾਸ ਦੀ ਗੱਲ,ਹੁਣ ਅਸੀਂ ਮੌਜੂਦਾ ਦੌਰ ਵਿੱਚ ਸਾਈਕਲ ਨੂੰ ਦੇਖੀਏ ਤਾਂ ਇਸ ਉੱਤੇ ਇਹ ਕਹਾਵਤ ਹੂ-ਬ-ਹੂ ਟੁੱਕਦੀ ਹੈ ਕਿ 'ਹਿੰਗ ਲੱਗੇ ਨਾ ਫੜਕੜੀ ਰੰਗ ਚੋਖਾ ਆਵੇ',ਮਤਲਬ ਬਾਈ ਬਾਕੀ ਤਾਂ ਤੁਸੀਂ ਸਮਝ ਹੀ ਗਏ ਹੋਵੋਗੇ,ਕਿ ਅੰਤਰਰਾਸ਼ਟਰੀ ਬਜ਼ਾਰ 'ਚ ਕੱਚੇ ਤੇਲ ਦਾ ਭਾਅ ਨਿੱਤ ਨਵੇਂ ਰਿਕਾਰਡ ਕਾਇਮ ਕਰਦਾ ਜਾ ਰਿਹਾ ਹੈ,ਜਿਸ ਕਾਰਣ ਕਈ ਕਹਿੰਦੇ ਕਹਾਉਂਦੇ ਪੈਟਰੋਲ ਪੰਪ ਵੱਲ ਮੂੰਹ ਕਰਨ ਵਾਲਿਆਂ ਨੂੰ ਪਸੀਨੇ ਆ ਜਾਂਦੇ ਨੇ,ਰਹੀ ਆਪਣੇ ਸਾਈਕਲ ਦੀ ਗੱਲ,ਨਾ ਇਸ 'ਚ ਪੈਟਰੋਲ ਪਵਾਉਣ ਦੀ ਜਰੂਰਤ,ਨਾ ਡੀਜ਼ਲ ਦੀ,ਇਸ ਗੱਲ ਨੂੰ ਧਿਆਨ 'ਚ ਰੱਖਕੇ ਖੁਦ ਕਈ ਵਾਰ ਚੈਨ 'ਚ ਪਜ਼ਾਮਾ ਫਸਾ ਕੇ ਪੜਵਾਉਣ ਵਾਲੇ ਗੁਰਦਾਸ ਮਾਨ ਨੇ ਇੱਕ ਗੀਤ ਲਿਖ ਮਾਰਿਆ ਹੈ,

ਆ ਨੀ ਕੁੜੀਏ ਜਿਉਣ ਜੋਗੀਏ ਰੱਬ ਦੇ ਦੇਖ ਨਜ਼ਾਰੇ,ਨਾ ਸਾਡੇ ਕੋਲ ਮੋਟਰਸਾਈਕਲ ਨਾ ਕੋਈ ਮੋਟਰਕਾਰ ਏ,ਇੱਕ ਟੁੱਟਿਆ ਜਿਹਾ ਸਾਈਕਲ ਸਾਡਾ ਹਰ ਵੇਲੇ ਡੰਗ ਸਾਰ ਏ,ਦੁਨੀਆਂ ਦੇ ਵਿੱਚ ਪੈਰੋਂ ਨੰਗੇ ਲੱਖਾਂ ਫਿਰਨ ਵਿਚਾਰੇ, ਮੈਂ ਤਾਂ ਫਿਰ ਵੀ ਸਾਈਕਲ ਤੇ ਹਾਂ,ਸਤਿਗੁਰ ਦੇ ਬਲਿਹਾਰੇ, ਓ ਰੱਬ ਦੀ ਮਰਜ਼ੀ ਦਾ ਕੋਈ ਕੀ ਕਰਲੂ ਮੁਟਿਆਰੇ,

ਆ ਨੀ ਕੁੜੀਏ ਜਿਊਣ ਜੋਗੀਏ ਸਾਈਕਲ ਰੰਗ ਬਿਰੰਗਾ,ਬਿਨ੍ਹਾਂ ਲਾਇਸੰਸੋ ਚੱਲਦੇ ਇੱਥੇ ਜਾਂ ਸਾਈਕਲ ਜਾਂ ਦੰਗਾ.ਸਾਈਕਲ ਦੇ ਵਿੱਚ ਤੇਲ ਪਾਉਣ ਦਾ ਨਾ ਧੂੰਏ ਦਾ ਪੰਗਾ.ਸਹਿਜ ਸੁਭਾਅ 'ਚ ਤੁਰਿਆ ਫਿਰਦਾ ਕਸਰਤ ਕਰਲੇ ਬੰਦਾ,ਹੋਰਾਂ ਦੇ ਲਈ ਪਿੱਛਲੀ ਕਾਠੀ ਅਤੇ ਘਰ ਵਾਲੀ ਲਈ ਡੰਡਾ,ਹੋ ਮਹਿੰਗੀ ਮੋਟਰ ਤੋਂ ਸਸਤਾ ਸਾਈਕਲ ਚੰਗਾ,ਮੈਂ ਆਖਿਆ ਲਾਲਾ ਜੀ,ਮਹਿੰਗੀ ਮੋਟਰ ਤੋਂ ਸਸਤਾ ਸਾਈਕਲ ਚੰਗਾ,

ਆ ਨੀ ਕੁੜੀਏ ਜਿਊਣ ਜੋਗੀਏ ਪੁੱਛ ਪੜਤਾਲਾਂ ਕਰਲੈ,ਜੇ ਹੈਂਡਲ ਵਿੰਗਾ ਢੇਡਾ ਹੋ ਜਾਏ,ਮਾਰ ਬ੍ਰੇਕਾਂ ਖੜਲੈ,ਗੋਡਿਆਂ ਦੇ ਵਿੱਚ ਟਾਇਰ ਫਸਾ ਕੇ ਹੈਂਡਲ ਸਿੱਧਾ ਕਰਲੈ,ਪੈਂਚਰ ਹੋਜੇ,ਹਵਾ ਨਿਕਲਜੇ ਪੰਪ ਮਾਰ ਕੇ ਭਰਲੈ,ਬਾਲ ਤਾਂ ਕਿਧਰੇ ਲੀਕ ਨੀ ਹੋਇਆ,ਥੁੱਕ ਲਾ ਕੇ ਚੈਕ ਕਰਲੈ, ਨੀ ਸਾਈਕਲ ਮਿੱਤਰਾਂ ਦਾ ਸ਼ਰਤ ਲਗਾ ਕੇ ਫੜਲੈ,

ਆ ਨੀ ਕੁੜੀਏ ਜਿਊਣ ਜੋਗੀਏ ਸਾਈਕਲ ਦਾ ਮੁੱਲ ਪਾਇਆ,ਸ਼ਾਬਾਸੇ ਵਿਗਿਆਨੀ ਨੇ ਜਿਹਨੇ ਬਾਈਸਾਈਕਲ ਬਣਾਇਆ,ਅਮੀਰਾਂ ਦੀ ਕਸਰਤ,ਗਰੀਬਾਂ ਦੀ ਹਸਰਤ,ਅਮੀਰਾਂ ਦਾ ਸ਼ੋਂਕ,ਗਰੀਬਾਂ ਦੀ ਰੋਟੀ ਤੇ ਸਰਮਾਇਆ ਮਿੱਤਰਾਂ ਦੇ ਨਾਲ ਰੇਸਾਂ ਲੱਗੀਆਂ,ਸਾਈਕਲ ਬਹੁਤ ਭਜਾਇਆ,ਬੜੇ ਪਜਾਮਿਆਂ ਨੂੰ ਚੈਨਾਂ 'ਚ ਫਸਾਇਆ,ਪਿਉ ਤੋਂ ਕੁੱਟ ਖਾਧੀ,ਬੇਬੇ ਨੇ ਗੱਲ ਲਾਇਆ,

ਆ ਨੀ ਕੁੜੀਏ ਜੀਊਣ ਜੋਗੀਏ ਨੀ ਦਰਦ ਦਿਲਾਂ ਨੂੰ ਛੋਹਿਆ,ਪਹਿਲੀ ਨੇਕ ਕਮਾਈ ਵਾਲਾ ਨੀ ਮੇਰਾ ਸਾਈਕਲ ਚੋਰੀ ਹੋਇਆ,ਕਿਸੇ ਗੁਆਚੀ ਚੀਜ਼ ਲਈ ਮੈਂ ਪਹਿਲੀ ਵਾਰ ਰੋਇਆ,ਇੱਕ ਫ਼ਕੀਰ ਖੁਦਾ ਦਾ ਬੰਦਾ ਅੱਗੇ ਆ ਖਲੋਇਆ,ਕਹਿਣ ਲੱਗਾ ਤੁਮ ਕਿਆ ਲਾਏ ਥੇ,ਕਿਆ ਥਾ ਜੋ ਅਬ ਖੋਇਆ,ਮੈਂ ਆਖਿਆ ਬਾਬਾ ਜੀ ਮੇਰਾ ਸਾਈਕਲ ਚੋਰੀ ਹੋਇਆ,ਅਰੇ ਮੂਰਖ ਸਾਈਕਲ ਖੋ ਕੇ ਗਾਡੀ ਲੇ ਗਾ,ਤੂੰ ਕਿਆ ਜਾਣੇ ਮੋਇਆ,ਮੋਇਆ ਮਤਲਬ ਮਰਜਾਨਾ,ਮਾਨ ਮਰਜਾਨਾ,ਅਭਿਮਾਨ ਓ ਵੀ ਮਰਜਾਨਾ,ਇਨਸਾਨ ਮਰਜਾਨਾ, ਮਰਜਾਨਾ ਗੁਰਦਾਸ ਮਾਨ ਮੈਂ ਉਸੇ ਦਿਨ ਤੋਂ ਹੋਇਆ,ਕਹਿੰਦਾ ਸਾਧ ਨਾਲ ਕੀ,ਤੈਨੂੰ ਚੋਰ ਨਾਲ ਕੀ,ਬਹਿਕੇ ਆਪਣੀ ਨਿਬੇੜ ਤੈਨੂੰ ਹੋਰ ਨਾਲ ਕੀ,ਸਾਧ ਵੀ ਉਸਦਾ,ਚੋਰ ਵੀ ਉਸਦਾ,ਮਿਰਗ ਵੀ ਉਸਦਾ,ਮੋਰ ਵੀ ਉਸਦਾ,ਜਾਨ ਵੀ ਉਸਦੀ,ਜ਼ੋਰ ਵੀ ਉਸਦਾ,ਚੁੱਪ ਵੀ ਉਸਦੀ,ਸ਼ੋਰ ਵੀ ਉਸਦਾ,ਬਾਕੀ ਰਹਿ ਗਿਆ ਕੀ ਕਿਸੇ ਦੇ ਚਰਨੀ ਲੱਗ ਕੇ,ਕਿਸੇ ਦੇ ਚਰਨੀ ਲੱਗ ਕੇ ਜੀ.

ਇਹੀ ਨਹੀਂ,ਕਈ ਹੋਰ ਪੰਜਾਬੀ ਗਾਇਕਾਂ ਨੇ ਵੀ ਇੱਥੇ ਹੋਰ ਗੀਤ ਬਣਾਏ ਹਨ,ਜਿਵੇਂ 'ਗਾਊਂ-ਗਾਊਂ,ਬਹਿਜਾ ਮੇਰੀ ਸਾਈਕਲ 'ਤੇ ਮੈਂ ਟੱਲੀਆਂ ਵਜਾਉਂਦਾ ਜਾਊਂ,'


ਇਹ ਸਤਰਾਂ ਸਨ,ਪੰਜਾਬੀ ਦੇ ਗਾਇਕਾਂ ਵੱਲੋਂ ਗਾਏ ਕੁੱਝ ਗੀਤਾਂ ਦੀਆਂ,ਇਸ ਤੋਂ ਬਿਨ੍ਹਾਂ ਮੋਟਾਪੇ ਨੂੰ ਘਟਾਉਣ ਲਈ ਰਾਏ ਦਿੱਤੀ ਜਾਂਦੀ ਐ,ਬਾਈ ਸਾਈਕਲ ਚਲਾਉਂਗੇ ਤਾਂ ਤੁਹਾਡੇ ਲਈ ਲਾਭਦਾਇਕ ਹੋਵੇਗਾ.ਸਾਈਕਲ ਚਲਾ ਲੱਖਾਂ ਲੋਕ ਆਪਣੇ ਘਰ ਦੇ ਕਈ ਜ਼ੀਆਂ ਦੇ ਪੇਟ ਪਾਲ ਰਹੇ ਹਨ ਪਰ ਹੁਣ ਤੁਸੀਂ ਇਹ ਵੀ ਪੁੱਛੋਗੇ ਕਿ ਬਾਈ ਇਸ ਵਿੱਚ ਪਸੀਨੇ ਛੁਡਾਉਣ ਵਾਲੀ ਕਿਹੜੀ ਗੱਲ ਐ,ਗੱਲ ਤਾਂ ਇਹ ਹੈ

ਬਾਈ ਹੁਣ ਦੂਜੀਆਂ ਵਸਤੂਆਂ ਦੀਆਂ ਕੀਮਤਾਂ ਵੱਧਣ ਦੇ ਨਾਲ-ਨਾਲ ਲੋਹੇ ਦੇ ਭਾਅ ਵੀ ਕਾਫ਼ੀ ਵੱਧ ਗਏ ਹਨ,ਜਿਸ ਨਾਲ ਹੁਣ ਸਾਈਕਲ ਦੀਆਂ ਕੀਮਤਾਂ ਵੱਧਣ ਦੇ ਅਸਾਰ ਵੀ ਕਾਫ਼ੀ ਦਿਖ ਰਹੇ ਹਨ,ਜਿਸ ਨਾਲ ਹਰ ਆਮ ਆਦਮੀ,ਮੱਧ ਵਰਗ ਆਦਮੀ,ਜੋ ਕੱਲ੍ਹ ਆਪਣੇ ਪਰਿਵਾਰ ਦੇ ਜੀਆਂ ਦਾ ਪੇਟ ਪਾਲਣ ਲਈ ਸਾਈਕਲ ਸਸਤਾ ਹੋਣ ਕਾਰਣ ਸਾਈਕਲ ਖਰੀਦ ਲੈਂਦਾ ਸੀ,ਅੱਜ ਇਹ ਸਥਿੱਤੀ ਬਨਣ ਲੱਗ ਪਈ ਐ,ਇਹ ਕੀਮਤਾਂ ਵੱਧਣ ਨਾਲ ਉਸ ਦਾ ਬੱਜਟ ਹੀ ਹਿੱਲ ਜਾਵੇਗਾ ਅਤੇ ਜੋ 10-15 ਮੀਲ ਪਹਿਲਾਂ ਲੋਕ ਸਾਈਕਲ 'ਤੇ ਜਾਂਦੇ ਸਨ,ਉਹਨਾਂ ਗਰੀਬਾਂ ਦੀ ਸਵਾਰੀ ਸਾਈਕਲ ਵੀ ਅੱਜ ਉਨ੍ਹਾਂ ਤੋਂ ਖੁਸਨ ਕਿਨਾਰੇ ਹੈ. ਜਿਵੇਂ ਪ੍ਰੇਮੀ ਨਾਲ ਪ੍ਰੇਮਿਕਾ ਰੁੱਸ ਜਾਂਦੀ ਹੈ,ਇਸੇ ਤਰ੍ਹਾਂ ਹੁਣ ਸਾਈਕਲ ਗਰੀਬਾਂ ਤੋਂ ਖੁੱਸ ਰਹੀ ਹੈ.